TROUSER GIRL hija opera mfassla għat-tfal. Jiġri li Chris, it-tfajla ta’ Lukey, hi s-supereroj Raybeam, li għandha l-abbiltà unika li tisplodi l-affarijiet b’għajnejha. Għall-bidu, Lukey jimpressjona ruħu, iżda maż-żmien jsir aktar frustrat minħabba li Chris tkun ta’ spiss ’il bogħod minnu, issalva d-dinja mill-qerda, u b’hekk, ma tantx ikollhom ħin flimkien. Biex tkompli tgħaxxaq, Danny, l-akbar ħabib ta’ Chris, magħruf ukoll bħala Transformo s-super-inkredibbli, huwa il- ħin kollu maġenbha. Lukey, ġuvni ordinarju mingħajr superpoteri, ma jistax ma jgħirx. Meta Chris, għall-għarrieda, tikkanċella l-ikla tas-sitt xhur anniversarju tagħhom, Lukey ifassal pjan kuraġġuż. Wara li ta’ malajr fittex fil-qoffa tal- ħwejjeġ ta’ ommu, jittrasforma fis-supereroj Trouser Girl. B’din l-identità l-ġdida, huwa jingħaqad ma’ Raybeam u Transformo fuq l-aħħar avventura tagħhom, determinat li jiskopri x’jagħmlu matul il-ħarbiet erojiċi tagħhom.